十月尾的經歷

打完上一篇千字文，再無打野，哈，因為要做 assignment。
咁呢幾日當然唔係坐係到啦，其中一日係出左去，去左 Auckland Museum 同 Devonport。

先按時間講返有咩發生

10-30 Auckland Museum, Devonport 之旅
呢日約好左 Den 哥同新嚟嘅 Will 仔去呢兩個地方，原本諗住揸車去接佢地，約好左九點半到達 YHA ，點知唔知發咩神經，行錯路，結果要十點先到達 YHA，接住去 Museum 都叫順利。去到 Museum 天氣好唔錯，大家喺門口影下相，跟住就入去。其實入去 Museum 參觀喺唔駛錢，佢叫你捐五蚊比佢，不過咁啱有個 Darwin 嘅展覽，好似幾吸引，於是大家就放低左 NZD 15 去購買入 Darwin 展既門票。入到 Museum，有毛利文化同有關大西洋既展覽，仲有 WW I 同 WW II。睇晒三層嘅展覽，大家奇怪點解搵唔到個 Darwin 展？睇完地圖再睇水牌都無咩進展，最後梗係問人。最尾終於搵到個場地，入去場地之前，其實大家經已好肚餓，於是大家喺 Museum Cafe 食左個 quick lunch，我就飲左杯好靚既 Mocha，大家可以搵相睇。
食完嘢飲埋杯咖啡，喺時間去睇個值 NZD 15 既 Darwin 展，入到去，頂！點解三分鐘就行晒！？字就係多，但係呢啲嘢我喺 Wikipedia 都睇到，駛乜山長水又遠嚟睇？仲要收我 NZD 15！？加上好多嘢以前都學過、聽過，場地只係得大約一個籃球場咁大，早知食咗嗰 NZD 15 蚊就算。最尾大家充滿住不滿咁填完份問卷，就預備去另一站 - Devonport

Devonport
離開 Auckland Museum，齊齊出發往 Devonport （其實喺去碼頭轉船）。由於唔知邊到有得泊車，左睇右睇終於搵到個爛地露天停車停，一睇價錢，咩話！？爛地都我 NZD 18 三個鐘！我地又拉隊去搵另一個車場。去到碼頭附近嘅停車場，泊好車一睇，咩話！？收我 NZD 32 三個鐘？駛唔駛？結果都係死死氣去返個爛地。幾經辛苦總於泊好車，就去碼頭坐船。其實船程好快，得幾分鐘，到左 Devonport，就去所謂既著名境點 - Ｍt Victoria。去到山腳，大家都行到勁熱，睇一睇錶，原來成三十度，但係轉頭上到山頂（其實兩三分鐘），有風吹一吹，又變返二十三度，日間溫差都咁大，你都咪話唔驚。上完山，再去左其它地方行吓，咁就完成左 Devonport 之旅，其實唔係無嘢睇，只喺我去得遲左少少，好多館都收左。原本諗住喺 Devonport 食埋晚餐，但係太貴，打消左念頭，我地睇餐牌既時後，仲有個洋人話我地知邊到邊到有壽司店，一定以為我哋係日本人啦。

結果大家係去左超市買野，再返 YAH 煮野食。

10-31 YHA 之牛扒餐
呢日真係無乜特別，都係做 assignment，特別在係我地約好左要食扒（超市買的）。
我七點半去到（呢次無行錯），開始預備，晚餐如下：

紐西蘭清水煮特級馬鈴薯
紐西蘭第一 “Wattie's 茄汁豆”
免費高級植物牛油香煎紐西蘭牛扒伴頂級紐西蘭蘋果
牛油香蒜炒中國小白菜皇
魔戒三部曲拍攝地 - 紐西蘭原產紅酒

我同 Den 哥同 Will 仔各自分工，先由 Den 哥做呢個水煮馬鈴薯，咁我就預備呢個蒜頭嚟炒菜。煮到咁上吓，德國代表 Flor 到場，我梗係請佢呢位由細食薯仔食到大嘅外國名廚去幫手睇住啲薯仔。我同 Den 哥就預備著手香煎我哋塊頂級牛扒，而 Will 仔就預備去炒個菜。
由於塊牛扒都成一點五厘米厚，於事我地預備先用猛火去煎熟表面，鎖住肉汁，再收細少少火去將牛扒煎至五至七成熟（視乎個人口味）。牛油起鑊煎牛扒呢啲低難度嘢，對我梗係無難度，當我猛火煎好一面，想將塊牛扒反轉既時候，塊牛扒竟然出現段層！？OMG！原來唔係一大塊牛扒，係一大叠牛扒！@#$！呢個時候我地唯有改變計劃，將厚煎牛扒變為煎薄牛扒。
雖然技術撘救，牛扒最尾都無過老（係過老，即係而家都老），而肉汁亦無法鎖住，突而奇來嘅段層亦令我地無準備咩汁。好彩食落去都有肉味同唔似牛肉乾或者香口膠，但喺要增加塊牛扒嘅汁，大家只好用蘋果或者茄汁豆嚟送牛扒食，去到呢個地步，大家都無晒預奇既興奮，都係怪自己細個唔讀好啲英文，唔識睇包裝。
食完牛扒，我地四個玩左陣 Big 2，咁我就預備搾車先送 Flor 去佢既 apartment（佢搬離左 YHA 啦終於），然後車自己返屋企。

出到去搵吓自己架車，點解咁大家車會唔見左呢？雖然夜晚係凍啲，但係架車唔會因為熱脹冷縮變到細到唔見咗架，呢個時間我心入面只係有兩個想法
1) 比人偷左
2) 比人拖左

由於小弟架錢七都唔值咩錢，我覺得係 2) 多啲。
但係夜麻麻十一點半，可以點呢？唔同我要訓街？好彩 Flor 願意借佢個地下比小弟過夜。
不過我唔甘心咁樣就要訓地下，再左搵右搵，睇吓我架車仔會唔會比其它車撞到唔知去左邊既時候，見到有架“乜乜 parking”既車，上前問吓係唔係佢地拖左我架車。查詢過後，應該係比政府拖左，佢地左個地址我，我梗係去試吓接返架車。
拎左地址，梗係跳上的士，第一時間去試吓搵返我架車，點知的士司機話佢唔識去！ WTF ！點出嚟行！好彩 Flor 有本 Lonely Planet，睇過地圖，我地決定行去！用左十分鐘既腳程，終於到達，去到放低 NZD 25，接返架車，拖我車既理由係泊車出界，我頂，好多車都出界啦！最衰仲要係十一點十分先拖，如果我早啲走就無事。不過點都係自己衰，我一定唔係再比 NZ 賺我呢啲錢！（仲有 NZD 130 要交，WTF！)
拎返架車，車返 Flor 去佢 apartment，順便參觀吓，跟住就返屋企，返到去都成點，唉！睇黎我呢排都無咩運行。

講到十月尾先啦，十一月嘅再講。

*** 其它 ***

離開左香港都兩個半星期，我到底有咩改變呢？
1) 鼻敏感無左
喺澳洲嗰一個星期都仲有鼻敏感，但係到左紐西蘭就無左，可能紐西蘭空氣好啲，又或消除鼻敏感要一段時間，不過紐西蘭勁多地衣，應該空氣好好。

2) 打左多 Blog
呢個相信大家有目共睹

3) 更注重英文同普通話發音
英文發錯音，老外聽唔明，為保港人面子，唔好成日比人話港仔英文差，我梗係努力啲去講！另外身處普通話家庭，普通話都喺要講得似樣少少先溝通到。

4) _ 都柯多左
到左通常食兩樣野做早餐，一喺就係牛奶沖沖早餐，一喺就香蕉，吔多咗蕉，真係 _ 都柯多兩篤

5) 早訓左
嗯，因為想生活健康啲。（定係因為無咩野做呢？）

6) 朋友既 blog 睇少左
因為呢到上網太慢...

7) 留意香港新聞多左
因為身不在香港

8) 嘢食少左
樣樣都貴，唔捨得食。

大致上係咁多，又喺時候睇相