Day back to last week

又有一排無打 Blog，呢排忙咩？都係返工放工煮飯同四圍行吓，等我 day back 返去上個星期啦！

話說上星期二，係好特別嘅一日，我識o個兩個香港女仔，佢地上星期一喺圖書館撞到個嚟自香港嘅太太，咁個太太聽見佢哋講廣東話，就問吓佢地喺唔嚟自香港，咁傾咗一陣，太太要離開圖書館，但係無幾耐太太竟然打電話去圖書館搵返小方佢地，仲話第二日等佢地放工，再去探佢地，我得知呢個消息，梗喺去八吓。

我去到嘅時間，香港先生太太經已到達，同佢地傾咗一陣，原來佢哋都移咗民過嚟十年有多，似乎喺怕左回歸而移民嘅港人？
再傾咗陣，佢地帶左我地去睇吓嗰頭有咩買，睇咗唔同地方，之後仲叫我地去佢屋企坐吓。
住嘅地方同我住嗰到差唔多，不過佢地就有個花園仔，有自己種吓嘢咁，都幾開心，有生菜呀，熱情果呀，士多啤梨咁。坐吓坐吓，佢地仲叫埋我地食飯，真係開心，好耐都無食過港式住家菜，當晚真係四餸一湯，白飯任裝架！:P

其實除左傾計同食嘢，當然發現嘅嘢唔止咁少，例如呢到退休保障真係好好，每個星期政府會比成四百幾蚊 NZD 你，如果你無屋住政府仲有房屋補貼比你，四百幾蚊有幾好用？其實一般一個人一星期用二百蚊 NZD 經已好夠（連埋租間房），咁你話有幾好呢？

其實到左 NZ，就會開始諗香港生活好定呢邊生活好，喺香港，可能你做足一世，到最尾都係一個仙都無，但係喺呢邊，起碼老左唔駛仲要同後生仔爭紙皮，可以快快樂樂咁安享晚年，好多人話福利社會讓懶人，但係香港嘅生活模式又迫到幾多人癲左呢？講到咁，大家喺唔喺會諗我唔會返嚟呢？

我點都會返香港嘅，因為香港始終喺我屋企。

瞓唔到，不過打住咁多先。哈！