詳述樓面工作

其實大大話話都做左兩個星期，等我詳細少少講吓份工啦！

雖然份工話由十一點開到下午三點，但係如果想食早飯，就要十點半返到去，食飯有啲咩呢？早餐嚟講，多數會有三個餸，會有菜有肉，白飯就任食，不過由於我習慣食少少嘢先揸車，所以都唔會食特別多。比較印像深嘅餸，我估喺牛腩？因為無諗過會食到，不過聽賣點心嘅姐姐講，好嘢都喺唔好食咁多，因為佢真係好嘢嘅話，老闆點解唔拎去賣呢？而午飯方面，就會有啲賣唔出嘅點心同會有炒飯炒米咁，好唔好餸就要睇吓嗰日好唔好生意啦。

之前講過十一點開市，其實十點四十五分就要做最後預備，即喺得十五分鐘食飯，不過唔駛錢唔好要求咁多（但係其實喺唔喺變相減工時 > 減人工？）。有啲咩要預備呢？例如洗吓魚_ ，睇吓各個“站台”啲嘢齊唔齊，仲有當然喺睇吓啲枱同餐具放得好唔好咁。

雖然話十一點開門，不過有客早嚟唔通趕佢走咩，不過都唔常見的。
有客嚟，會發生嘅其實同香港差唔多，都係開茶同叫嘢食。點心呢邊仲喺推車字或者人肉推銷，不過當然有例外就喺太早同太遲，就會落柯打叫嘢食啦。

咁賣嘢食就無我份，不過有時都有客叫我落柯打，最初去廚房落柯打，成個傻仔咁，搵邊個師傅又唔知，點落又唔知，慢慢過左兩個星期，大約都知要搵邊個師傅，亦都無再比人當傻仔。而其餘做嘅都係收吓碟呀，收吓籠呀，有人走左要快手快腳咁 set 返好張枱咁囉。到差唔多收工，就要預備好聽日要嘅野，跟住就收工食飯！

雖然好多野聽落都好簡單，但係做落都有一定技巧，例如點樣可以兩隻手收最多杯碗碟，雖然呢啲經驗對我無咩用，但係試吓都幾特別。

我估我份新工大約係咁啦~