Euro08 & 激流之旅

2008 歐國杯，由於屋企無“現在”，所以成個歐國杯都無咩點睇，都喺睇吓精華同新聞。不過對於我呢個唔太熱衷睇波嘅人其實無咩關喺，其實睇唔睇呢場決賽，我都諗咗好耐，最後都喺決定唔搵周生住，睇吓呢場“二奶皇”可唔可以打破佢嘅命運。

可惜除咗開波頭十五分鐘，我覺得全場德國隊都係喺發夢之吓比人玩，相信佢呢場都算喺佢地打得最差嘅一場。“二奶皇”亦無拆自己招牌，爆頭之餘仲歷史性成為“四亞皇”，其實睇見佢都傷心。不過我當然唔會帶住呢份傷心去訓，因為訓三個鐘左右又要起身返工。

不過唔知個天喺唔喺想玩我，定喺佢因為買重德國而傷心。

今朝返工，超大雨，行去地鐵站，行咗都無十分一，經已成褲濕晒，平時行開嗰條平靜嘅小路，今日變得異常刺激，有水池，有激流，仲有個小瀑布 tim ~，基本上落到地鐵站，成個下半身都滴緊水，我都唔知自己喺水上飄緊定喺路行緊囉。當濕晒嘅褲滴水落濕晒嘅鞋，原來喺無咩感覺。一路行一路滴，一路滴一邊睇都市日報，雖然返到公司嗰陣都差唔多滴完，可惜對𧙕仲喺扭得出水，去廁所扭完水，抺完都仲喺咁濕，結果而家對𧙕“條條 fing”咁放咗喺我枱吓面，唔知放工前佢會唔會乾呢？