新手爸記 - 抱 B 篇

BB 出世，做爸爸梗係想抱吓佢，但係初生嬰兒頸未夠力，所以抱佢要特別注意。坊間有好多有用資訊大家可以參考，我想分享既有：

1）練習 ﹣ 搵吓有冇 BB 咁上下大既公仔試吓，唔只練抱上手同放低，仲可以練轉手（左右轉右手，由手掌支撐轉用手臂支撐等），雖然有一定分別，但係起碼做吓個動作，實戰時都有個概念係點做。

2）了解 ﹣ 再一次了解人體結構，知道咩部位可以受力。初生嬰兒骨骼相對較軟，搵支撐點抱佢要知咩位置可以用力，咩位置唔可以。當掌握到其實抱 BB 都唔會太難。

3）應變 ﹣ 初生 BB 隨時都會郁，所以抱住 BB 時唔可以掉以輕心，有咩意外發生就唔好啦。

當大家掌握到點抱 B，就可以好好享受同小寶寶既時光啦。

新手爸記 - 生產篇

太太選擇順產而有得陪產既男士，事前應該睇多啲變變變生命力，生命奧秘等類型節目，因女性順產係一個包含科學、暴力、科技同血腥既節目，觀眾係絕對需要做足心理準備。唔好生到一半見血暈咗就唔好。

可能由於我高中讀生物科並有收看以上節目，所以過程個過程也知一二，不同的是因為我太太經已穿水一陣子，所以不會見到“缺堤”特效。

生產過程時，其實男人可以做既只係企埋一邊，唔係叫你唔好比支持你老婆，不過綜合個人經驗同朋友分享，呢個時候無論你講加油，同姑娘一齊指令老婆，諗住講笑令老婆無咁痛既下場都只係會比人叫你收聲，鬧你甚至爆粗趕你走。

所以大家都係抺下汗安全啲，當然如果你內人要求你做啲咩你最好幫下手，見佢唔記得呼吸方法都可以係佢抖緊嗰陣提下～ （抖？因為女性生產需要於宮縮（陣痛）時出力才有效，所以没有宮縮時可作休息）幫佢用笑氣等。

到 BB 出世，大家會見到一個濕晒，個身紫色同個頭好長有啲似異形既物體，無錯佢就係你個小朋友啦～ BB，呢個時候助產仕同姑娘會幫佢抽走肺入邊既胎水，順便整喊佢，再抺身同剪臍帶，我地可以留意吓既只有外觀同佢有冇喊，無耐佢就會變返人色架啦～

當去到呢個步驟，護士就差唔多會問你老婆生咗仔定女，咁跟住男人可以參與既部份就完架啦～ 我就係比人送返出電梯大堂，當 BB 同老婆經過就可以同佢 say 個 hi，然後就跟探病時間去睇佢地啦～